ماحدش هيحس بألمك و بحرقتك
زى إحساسك من جواك
هى بس نفسك اللى تحسك
و بأنينك هتلاقيها حساك
ألم النفوس
مهما كان صعب عليك
ومهما صعبت عليك نفسك
أو مهما حس بيك من حواليك
ماحدش يحسك
زى إحساسك بنفسك
لأن فيه أحاسيس كتير
مابتتحكيش، مابتتوصفش، مابتتنسيش
إلا بينك و بين نفسك
وبين إحساسك من جواك
بس المهم
ماتتأثرش، ماتستسلمش، ماتتهزمش
لإنكسارك بينك و بين نفسك
هتلاقى ساعتها الجرح قواك
هى دى لعبة حياتنا
لعبة آهاتنا فى إنكسارنا
حكمة قدرنا
اللى عمره ما هيكون بإختيارنا
لعنة نفوس
بتألمك وبتخدعك
حتى فى سكاتك
ما تسلمش منها فبتوجعك
لعنة قلوب
بتحرمك من منامك
و حتى فى أحلامك بتجرحك
و إن سلمت ليها هتضيعك
و آه لما تسمع صرختك
و آه لما تحس بلسعة دمعتك
بتلاقيها صرخه عاليه
مليانه حزن . . و الدمعه غاليه
و ماحدش يحسك
زى إحساسك بنفسك
وهو ده صدى صوت لأنين و آهه
بتلاقى نفسك دخلت فى متاهه
مش مجرد لحظه فى حياتك
لأنها لحظة ألم و يمكن ندم
هتتحسب كماضى فاتك
و ده أكيد بيكون إختبار
و لازم يمر
مهما لو كان كله شوك
و حلاوته مر
لازم تحاول، لازم تقاوم، لازم تواصل
علشان تلاقى نفسك
عندك عزيمه، عندك إراده، عندك إيمان
بإنتصارك لثقتك فى نفسك
خلى صدمتك تقويك و صدق عينيك
إن إنت فى دنيا مش فى جنه
وإياك تفكر أوحتى تستنى
حد يمسح دمعتك
أو حتى يواسيك
بس لازم تصدق نفسك
بص حواليك
شايف ملايكه ؟
بص فى مرايتك
شايف ملاك ؟
صدق عينيك ماتكدبش نفسك
خلى ملايكتك تكون إيديك
و إمسح دموعك لنفسك
بص فى إيديك
شايف دموعك ؟
خليها صوره أو حتى ذكرى
تفتكرها لو هتضعف
و عيش لبكره
و أكيد هتقويك
لما تلقى دموعك سر قوتك
لما تلاقى جرحك يستقوى بيك
ساعتها هتلاقيك
كسبت نفسك
