على قيد الحياه ومش عايش
فيا الروح لكن مش حي
جسمي من الدموع بايش
يشوفني الفرح يقول مش جي
فاللي عاوز ينهي حياته
من عندي يتفضل
بابي مفتوح ومش بقفله
ومن وسعه يفوت جمل
الوجع ع مقاسي متفصل
في وسعك تاني ايه تعمله
أكتر من اللي بإيديك إتعمل
فماتلومنيش ولا تعاتب
لا وجودك فرض ولا واجب
ولا وارد تكون حاضر
ولو على جبر بخواطر
عشان خاطري
رجع عمري اللي معاك إتبدل
و ده شرطي و ده حكمي
وإذا كان عاجبك
انا اللي اتشرط عشان عمري
ضيعته معاك ولا عجبك
فرشته سنين بحنيه
بقولك خطي بهداوه
خايف عليك لا تتكعبل
جت دوسة رجلك معديه
شاطت الحلو بغباوه
ضيعت في فرصك فإستقبل
كل اللي فات خلاص بقى كوم
والكوم الجاي كون تاني
آنهي حلو ده اللي يدوم
والا بيكمل بأغاني
لقيت في كوكب إكتشافي
إن الولا حاجه عمرها ماتضر
وعشان أثبتلك إختلافي
لف تاني للخلف در
وما تقوليش ان انا من ناسك
عادي أعيش مقطوع من شجره
لو كان فرع الشجره دي أهل
مابقيتش اللي أبكي ع إحساسك
من أوجاعي كسبت الخبره
أكتشف الزيف كأسهل سهل
وياريت تنطق إني إتغيرت
باينه الجمله في ملامحك
وبشكر فيك إن أنا قررت
أني مش هعرف أسامحك
فيلا قولها وإسعدني
حسسني إني قادر أعيش
ماهي آخر وقعه علمتني
إني مش مخلوق علشان تلطيش
هقولك كلمه قالوها علشانك
قالوا وقعة الشاطر بألف
وهقولك حلقه خليها ف وادنك
أنا الشاطر اللي منه بألف
فماتستغربش
أنا ياما ذاكرت ياما عافرت
ياما راجعت في دموعي
وخدت من آهاتي دروس
شربت المر من ضلوعي
مابين ملموس وبين محسوس
وكان المنهج إني أعاني
وبما إن لكل قاعده شواذ
ذاكرت الحاجه اللي وجعاني
لحد مابقيت الممتاز
وبقدملك أرقي تهانى
لأنك كنت الأستاذ
